देवळाली प्रवरा / प्रतिनिधी
देवळाली प्रवरा येथे सर्वधर्माच्या वतीने व श्री साई प्रतिष्ठाणच्यावतीने प्रतिवर्षाप्रमाणे नववर्षाच्या पहिल्या आठवड्यात गुरुवार दिनांक २ ते ९ जानेवारी २०२५ दरम्यान श्री साई सच्चरित्र पारायण सोहळा व भव्य कीर्तन महोत्सवाचे आयोजन करण्यात आले आहे.
गेल्या १० वर्षापासून श्री साई प्रतिष्ठान देवळाली प्रवरातील सर्वधर्मीय व देवळाली प्रवरा ग्रामस्थांच्यावतीने महंत उद्धव महाराज मंडलिक यांच्या अधिपत्याखाली साई पारायण व कीर्तन महोत्सवचे आयोजन करण्यात येते. यंदाच्या ११ व्या साई उत्सवास २ जानेवारी रोजी सुरु होणार असून सांगता ९ रोजी होणार आहे. गुरुवार २ जानेवारी रोजी सकाळी ७ वाजता कलश पूजन व ग्रंथ पूजन होईल. त्यानंतर पारायण वाचनास सुरुवात होणार आहे. या उत्सवानिमित्त सकाळी ४.३० वा,
काकड आरती, सकाळी ८ ते १२ साईसच्चरित्र पारायण, माध्यन्ह आरती , सायंकाळी ४ वाजता हरिपाठ सायंकाळी ६ वाजता धूप आरती व त्यानंतर ७ ते रात्री ९ वाजेपर्यंत कीर्तन, शेज आरती व नंतर महाप्रसाद होईल. पारायण व्यासपीठ चालक गणेश महाराज मुसमाडे हे आहेत. उत्सवाच्या काळात हजारो भाविकांसाठी सकाळी नाश्ता तर दुपार व रात्री महाप्रसादाचे अन्नदात्यांच्या सहकार्याने आयोजन केले आहे
कीर्तन महोत्सवानिमित्त ०२ जानेवारी रोजी बाबानंद महाराज वीर, ०३ जानेवारी रोजी गणेश महाराज वाघमारे (ओझरकर), ४ जानेवारी रोजी किशोर महाराज दिवटे (जालना), ५ जानेवारी रोजी आदिनाथ महाराज शास्त्री (तारकेश्वर गड), ६ जानेवारी रोजी ज्ञानेश्वर महाराज कदम (आळंदी), ७ जानेवारी रोजी देविदास महाराज म्हस्के (नेवासा), ८ जानेवारी रोजी पांडुरंग महाराज वावीकर यांचे कीर्तन होणार आहे. ८ जानेवारी रोजी दुपारी ४ वाजता ग्रंथ मिरवणूक व ६ वाजता दीपप्रज्वलन कार्यक्रम होईल. ९ जानेवारी रोजी सकाळी ९ ते ११ उद्धव महाराज मंडलिक (नेवासेकर) यांचे काल्याचे कीर्तन व त्यानंतर भव्य महाप्रसादाने उत्सवाची सांगता होणार आहे.
या पारायण सोहळ्यास व कीर्तन महोत्सवास सर्वांनी उपस्थित राहून या कार्यक्रमाची शोभा वाढवावी. असे आवाहन श्री साई प्रतिष्ठान व शहरवासीयांनी केले आहे.
