पालकमंत्री राधाकृष्ण विखे पा., आ.संग्राम जगताप, खा.डॉ.सुजय विखे, महापौर रोहिणी शेंडगे यांची उपस्थिती
नगर – इंग्रजांना वेगवेगळ्या युद्धात तब्बल 18 वेळा पराभुत करणार्‍या शूर महाराजा यशवंतराव होळकर यांच्या शौर्ययात्रेचे पुणे ते इंदौर आयोजित करण्यात आले असून, ही यात्रा नगरला 8 मे 2023 रोजी एक दिवस मुक्कामाला थांबणार असून या निमित्त समाज प्रबोधन करण्यात येणार आहे.
यशवंतराव होळकरांचे थेट वंशज स्वप्नीलराजे होळकर यांच्या मार्गदर्शनाखाली सुरु होत असलेली ही शौर्ययात्रा नगर बसस्थानक चौकातील छत्रपती शिवाजी महाराजांच्या पुतळ्यास पुष्पहार अर्पण करण्यात येणार आहे. याप्रसंगी शहराचे आ.संग्राम जगताप, महापौर रोहिणी शेंडगे आदि स्वागत करतील. त्यानंतर ही शौर्ययात्रा स्टेट बँक चौक, डिएसपी चौक, प्रेमदान चौक, पुण्यश्लोक अहिल्याबाई होळकर, भिस्तबाग येथे समारोप करण्यात येणार आहे. या ठिकाणी खा.डॉ.सुजय विखे पाटील उपस्थित राहून मार्गदर्शन करणार आहेत. यानंतर समाज बांधवांच्यावतीने या शौर्ययात्रेचे ढोल ताशांच्या गजरात स्वागत करुन पायी मिरवणुकीने गंगा लॉन येथे मुक्कामी थांबणार आहे. यावेळी राज्याचे महसुलमंत्री तथा पालकमंत्री ना.राधाकृष्ण विखे पाटील उपस्थित राहणार आहेत.
या शौर्य यात्रेच्या मार्गवर धनगर समाजाचे पारंपारिक गजनृत्य, घोडे, उंट, ध्वजधारी पादचारी असा दिमाखदार सोहळा करण्याचे नियोजन असून, या संदर्भात समाजाच्या प्रतिष्ठीत बांधवांनी लोकवर्गणी दिली आहे. या शौर्ययात्रेच्या निमित्ताने विविध भागातील लोकप्रतिनिधी समाजप्रेमींची समिती गठीत करण्यात आली असून, केडगांव ते गंगा लॉन या मार्गावर विविध ठिकाणी स्वागत होणार आहे.
नगर येथील नियोजनाच्या बैठकप्रसंगी राजेंद्र पाचे, सुभाष भांड, वसंत दातीर, राजेंद्र तागड, डॉ.अशोक भोजने, निवृत्ती दातीर, प्रा.शरद दलपे, चंद्रकांत तागड, निशांत दातीर, ज्ञानदेव घोडके, ज्ञानेश्वर भिसे, ऋषी ढवण, पांडूरंग दातीर, विनय भांड, खंडू कजबे, अंबदाास पाचे, ज्ञानदेव तागड आदिंसह समाज बांधव मोठ्या संख्येने उपस्थित होते.
