सुदैवाने जीवित हानी झाली नाही
कोपरगाव(वार्ताहर ) कोपरगाव तालुक्यातील चांदेकसारे येथील झगडे फाटा फुलवर सध्या रस्त्याचे काम सुरू असून वाहन चालकांना आपल्या वेगावर नियंत्रण ठेवता येत नसल्याने मोठी दुर्घटना घडण्याची शक्यता निर्माण झाली आहे. काल सकाळी दहा वाजता अशाच आयशर टेम्पो चालकाचे वाहनावर नियंत्रण नसल्याने टेम्पो पलटी झाला सुदैवाने तेथे जीवित हानी झाली नाही. मात्र वर्दळीच्या ठिकाणी अशा घटना घडल्या तर मोठी दुर्घटना घडू शकते त्यामुळे या परिसरात रोडवर सफेद साईट पट्टे मारावे अशी मागणी परिसरातून होत आहे.
काल संभाजीनगर येथुन भरगाव वेगाने चाललेला एमएच २० जीसी ५५५८ क्रमांकाचा आयशर कंपनी चा रद्दी घेऊन चाललेला टेम्पो नासिक कडे चालला होता. टेम्पो झगडेफाटा येथे आल्यावर टेम्पो चालकाला आपल्या गतीचा अंदाज आला नाही व समोर चौफुली असल्याने त्याचे वेगावरील नियंत्रण सुटले व टेम्पो उलटला .सुदैवाने रोज रोडच्या बाजूने कोपरगाव शिर्डी कडे जाण्यासाठी नागरिकांची मोठी वर्दळ असते. रिक्षा स्टॅन्ड व बस स्टॅन्ड कडे नागरिक उभी असतात मात्र नेमके त्यावेळी तेथे कोणीच नसल्याने जीवितहानी टळली. शेजारी कोपरगाव नासिक नादुरुस्त एस टी उभी होती. एसटीच्या बाजूलाच टेम्पो पलटी झाला.
सदर घटनेची माहीती कोपरगाव पोलिसस्टेशनचे पोलिसनिरीक्षक वासुदेव देसले यांना पत्रकार शिवाजी जाधव यांनी भ्रमणध्वनीवरुन दिली. देसले यांनी कोपरगाव तालुका पोलीस स्टेशनचे पोलीस घटनास्थळी पाठविले .चालकाने आपल्या मालकांना फोन लावत त्यांना घटनास्थळी बोलून घेतले. क्रेनच्या साह्याने उशिरापर्यंत टेम्पो उचलण्याचे काम सुरू होते.
सिन्नर ते सावळीविहीर पर्यंत रस्त्याचे काम झालेले आसुन वाहने प्रचंड वेगाने धावतात झगडेफाटा चौफुलीवर दिशादर्शक लावलेले नाही ,मार्ग सुची नाही, साईडपट्टे नाही त्यामुळे अशा घटना वारंवार घडत आहे. त्यामुळे या परिसरात दिशादर्शक, मार्ग सूची व साईट पट्टे ओढावी अशी मागणी करण्यात आली आहे..
