लुटारु नागापूर,बोल्हेगाव,श्रीरामपूरचे व एक स्थानिक, एका अल्पवयीन मुलाचा समावेश
देवळाली प्रवरा / प्रतिनिधी
राहुरी तालुक्यातील ब्राम्हणी येथील दूध शितकरण केंद्राची १७ लाख रुपयांची रोकड लुटणाऱ्या टोळीतील विधीसंघर्षीत बालकासह तीन आरोपींना स्थानिक गुन्हे शाखेने जेरबंद केले आहे. या बाबत सविस्तर माहिती अशी की, ३० डिसेंबर २०२४ रोजी राहुरी तालुक्यातील ब्राम्हणी येथील मुळा ग्रो प्रोडक्ट लि. ब्राम्हणी या कंपनीचे कर्मचारी १७ लाख रुपये रोख रक्कम बँकेमध्ये भरणा करण्यासाठी घेऊन जात चारचाकीमधून घेऊन असताना अज्ञात चोरट्यांनी या चारचाकीच्या काचा फोडून, रोकड असलेली बॅग बळजबरीने घेऊन गेले.
याबाबत राहूरी पोलीस स्टेशन येथे गु.र.नं. १३१३/२०२४ बीएनएस कलम ३०९ (६) प्रमाणे जबरी चोरीचा गुन्हा दाखल झालेला आहे. अहिल्यानगर पोलीस अधीक्षक राकेश ओला यांनी स्थानिक गुन्हे शाखेचे पो.नि. दिनेश आहेर यांना घटनेची प्राथमिक माहिती देताच नमूद गुन्ह्याचा समांतर तपास करून, गुन्हा उघडकीस आणणेबाबत आदेशीत केले होते. या आदेशाप्रमाणे साहय्यक पोलिस निरीक्षक . हेमंत थोरात,पोलिस उपनिरीक्षक तुषार धाकराव व पोलीस अंमलदार मनोज गोसावी,गणेश भिंगारदे,ज्ञानेश्वर शिंदे, संदीप दरंदले, संदीप पवार, सोमनाथ झांबरे, बाळासाहेब खेडकर, रणजित जाधव, प्रमोद जाधव, अमृत आढाव, विशाल तनपुरे, किशोर शिरसाठ, रमिझ आतार, फुरकान शेख, प्रशांत राठोड, मेघराज कोल्हे, महादेव भांड, अरुण मोरे यांचे दोन स्वतंत्र पथके तयार करून सदर पथकांना गुन्ह्यातील
आरोपींची माहिती व शोध घेणेबाबत सूचना करून पथके रवाना केले.पथकाने तात्काळ घटना ठिकाणी भेट देवून फिर्यादीकडुन आरोपींचे वर्णन प्राप्त करून तसेच घटना ठिकाणचे आजुबाजुच्या रस्त्याचे सी.सी.टी.व्ही. फुटेज तपासून आरोपीबाबत माहिती संकलित केली. सदर आरोपीची वर्णन तसेच तांत्रिक विश्लेषणाचे आधारे फिर्यादीचे मुळा ग्रो प्रोडक्ट लि.ब्राम्हणी, ता. राहरी वा डेअरीमध्ये काम करणारा विधीसंघर्षात बालक याचा गुन्ह्यामध्ये सहभाग असल्याचे निष्पन्न झाल्याने त्यास ताब्यात घेवून त्याचेकडे गुन्ह्याबाबत सखोल व बारकाईने विचारपूस करता, त्याने मुळा ग्रो प्रोडक्ट डेअरीमधील रोख रक्कम बँकेमध्ये कधी भरण्यासाठी जाते, याबाबतची माहिती त्याचा मावसभाऊ अमोल शिंदे यास दिली होती. त्यानुसार अमोल शिंदे याने त्याचे साथीदार सचिन वायदंडे, शुभम गुळस्कर, अभिषेक जाधव, पप्पू कुसळकर, मोहन लष्करे यांचेसह लुटीचा कट तयार करून मोहन लष्करे याने रोकड असलेल्या गाडीवर पाळत ठेवून गाडी डेअरीमधुन निघाल्यापासूनची संपूर्ण माहिती आरोपींना दिली. त्यानंतर रोकड असलेली गाडी अडवुन,गाडींच्या काचा फोडुन गाडीमधील रोकड असलेली बॅग लुटून ते पसार झाले.
गुन्ह्यातील इतर आरोपीचा पथके शोध घेत असतांना तांत्रिक विश्लेषणाचे आधारे व मिळालेल्या गोपनिय माहितीनुसार आरोपी सचिन राजेंद्र वायदंडे (वय- २४ वर्षे), रा. गेट नं. ०६, सम्राटनगर, नागापूर, एम. आय. डी.सी. ता. जि. अहिल्यानगर मुळ रा. अचानकनगर रोड, खंडाळा, ता. श्रीरामपूर जि. अहिल्यानगर, शुभम मनोज गुळस्कर (वय २४ वर्षे), रा. बोल्हेगाव, एम.आय.डी.सी. ता. जि. अहिल्यानगर, अभिषेक लक्ष्मण जाधव, वय २४ वर्षे, रा. नवनागापूर, गजानन कॉलनी, ता. जि. अहिल्यानगर हे बोल्हेगांव, एम.आय.डी.सी. परिसरामध्ये मिळुन आल्याने त्यांना ताब्यात घेवुन त्यांच्याकडे गुन्ह्यातील चोरी गेलेल्या मुद्देमालाबाबत सखोल व बारकाईने विचारपूस करून आरोपींकडून गुन्ह्यांतील गेले मालापैकी ३ लाख रुपये रोख रक्कम १ लाख रुपये किमतीची गुन्ह्याचे वेळी पलेली दुचाकी, १२०० रुपये किमतीचे गुन्ह्यात वापरलेले हत्यार एक लोखंडी तलवार, लोखंडी फायटर असा एकूण ४,०१, २०० रुपये किमतीचा मुद्देमाल जप्त करण्यात आला आहे. ताब्यात घेण्यात आलेल्या आरोपीपैकी शुभम मनोज गुळस्कर हा रेकॉर्डवरील सराईत गुन्हेगार असून त्याच्याविरुध्द यापुर्वी नारायणगाव पोलीस स्टेशन येथे खुनाचा गंभीर स्वरुपाचा गुन्हा दाखल आहे. ताब्यातील आरोपी व विधीसंघर्शत बालक यांना गुन्हाचे तपासकामी राहुरी पोलीस स्टेशन येथे हजर करण्यात आले असून गुन्ह्याचा पुढील तपास राहुरी पोलीस करीत आहे.
