सातारा : येथील डाॅ. जान्हवी जयप्रकाश इंगळे या युवतीने एकाच वेळी 12 वेगवेगळ्या योग आसनांमध्ये विश्वविक्रम प्रस्थापित केले आहेत. प्रत्येक आसनांचा होल्डिंग टाईम वेगळा असल्यामुळे या विश्वविक्रमांची नोंद अमेझिंग ऑलंम्पिया कॅनडा बुक ऑफ वर्ल्ड रेकॉर्डमध्ये झाली आहे.
जान्हवी यांना वर्ल्ड रेकॉर्डचे प्रमाणपत्र आणि गोल्ड मेडल प्राप्त झाले आहे.
कॅनडा बुक ऑफ वर्ल्ड रेकॉर्डमध्ये एकाच वेळी 12 विश्वविक्रम प्रस्थापित करणाऱ्या डॉ. जान्हवी इंगळे या येथील पहिल्या युवती ठरल्या आहेत. 12 आसनांमध्ये भुजंगासन (3 मिनिटे 9 सेकंद), अंजनेयासन (1 मिनिटे 8 सेकंद), भद्रासन (30 मिनिटे 10 सेकंद), उष्ट्रासन (2 मिनिटे 4 सेकंद), बालासन (10 मिनिटे 27 सेकंद), फलकासन (1 मिनिटे 1 सेकंद), उत्तान मंडूकासन (7 मिनिटे 5 सेकंद), जानु शीर्सासन (1 मिनिटे 12 सेकंद), पर्वतासन (3 मिनिटे 6 सेकंद), वृक्षासन (3 मिनिटे 6 सेकंद), गुप्त पद्मासन (7 मिनिटे 12 सेकंद) ,गोमुखासन (10 मिनिटे 12सेकंद) या आसनांमध्ये स्थिर राहून त्यांनी विश्वविक्रम प्रस्थापित केला आहे.
डॉ. जान्हवी इंगळे या ‘जान्हवी की’ योगशाळेच्या संस्थापिका असून यांनी यापूर्वी 5 तास 1 मिनिट 17 सेकंदाचा सिद्धासन आसन करत पहिला जागतिक विश्वविक्रम केला. तर दुसरा जागतिक विश्वविक्रम नऊवारी साडी परिधान करून 1 तास 19 मिनिटे 34 सेकंद हा 10 हजार वेळा तितली क्रिया केल्याची नोंद करण्यात झाली आहे.
तिसरा विश्वविक्रम 8 तास 13 मिनिटे 21 सेकंद सुप्त बद्ध कोनासन करून केला. त्या राष्ट्रीय योगा ब्रॅण्ड अम्बेसिडर असून अनेक सामूहिक आणि वैयक्तिक विश्वविक्रम त्यांच्या नावावर नोंद झाले आहेत. अनेक आंतरराष्ट्रीय, राज्यस्तरीय, राष्ट्रीय पुरस्कार अशा साडेतीनशेहून अधिक पुरस्कारांनी त्यांना सन्मानित करण्यात आले आहे. या बारा विश्वविक्रमांची नोंद अमेझिंग ऑलंम्पिया कॅनडा बुक ऑफ वर्ल्ड रेकॉर्डमध्ये झाल्यानंतर जान्हवी यांचे सर्व स्तरातून कौतुक होत आहे..
