विद्यार्थ्यांना अंडी, केळी वाटपाच्या अनुषंगाने शालेय शिक्षण विभागाचे निर्देश
देवळाली प्रवरा /राजेंद्र उंडे
प्रधानमंत्री पोषण शक्ती निर्माण योजनें अंतर्गत राज्यातील विद्यार्थ्यांना अंडी, केळी देण्यात येतात, मात्र आता या योजनेतंर्गत पालकांनी अंडी खाण्यास सहमती दर्शविलेल्या मुलांच्या ओळखपत्रावर लाल रंगाचा( रेड सिग्नल), तर शाकाहारी मुलांच्या किंवा पालकांनी अंडी खाण्यास नकार दिलेल्या मुलांच्या ओळखपत्रावर हिरवा (ग्रीन सिग्नल) ठिपका दिला जाणार आहे. तसेच शाळेतील ४० टक्के विद्यार्थ्यांनी अंड्याऐवजी केळ्याची मागणी केल्यास त्या शाळेतील सर्व विद्यार्थ्यांना केळी किंवा अपवादात्मक स्थितीत स्थानिक फळ दिले जाणार आहे.
शालेय शिक्षण विभागाने यावाबतचे परिपत्रक प्रसिद्ध केले. विद्यार्थ्यांना आंडी, केळी देण्याच्या अनुषंगाने येणाऱ्या अडचणी, त्या संदर्भात शासनाकडे आलेली निवेदने विचारात घेऊन योजनेच्या अमलबजावणीत अधिक स्पष्टता येण्यासाठी शालेय शिक्षण विभागाने सूचना परिपत्रकाद्वारे दिल्या. राज्यातील आनेक नागरी भागात इस्कॉन संस्थांतर्गत असलेल्या अन्नामृत फाउंडेशन, अक्षयपात्र या संस्थांमार्फत केंद्रीय स्वयंपाकगृह प्रणालीद्वारे तयार आहाराचा पुरवठा करण्यात येतो. इस्कॉन या सेवाभागी संस्थेच्या कार्यप्रणालीचा विचार करता,नागरी भागात अन्नामृत फाउंडेशन, अक्षयपात्र या संस्थांच्या अधीनस्थ असणाच्या शाळ्यंमधील संपूर्ण विद्यार्थ्यांना नावीन्यपूर्ण उपक्रमांतर्गत प्रतिविद्यार्थी पाच रुपये रकक्मेच्या मर्यादित केळी अथवा अपवादात्मक परिस्थितीत स्थानिक फळ उपलब्ध करून देण्यास अनुमती देण्यात येत आहे. नागरी भागात केंद्रीय स्वयंपाकगृह प्रणालीमार्फत तयार आहाराचा पुरवठा महिला बचत गटामार्फत करण्यात येतो. नागरी भागातील बचत गटाकडील लाभार्थी संख्या विचारात घेता ज्या शाळांमधील विद्यार्थ्या पैकी ४० टक्के विद्यार्थ्यांनी अंड्याऐवजी केळी देण्याची मागणी केल्यास संबंधित शाळेमधील सर्व विद्यार्थ्यांना केळी अथवा अपवादात्मक परिस्थितीत स्थानिक फळ देण्यास अनुमती देण्यात येत असल्याचे नमूद करण्यात आले आहे.
शाळा स्तरावर अंडी, केळी देण्याच्या अनुषंगाने पालकाने त्याच्या पाल्यास अंडी खाण्यास सहमती दर्शविल्यास संबंधित पाल्याच्या ओळखपत्रावर लाल रंगाचा ठिपका(रेड सिग्नल), शाकाहारी विद्यार्थी किंवा पालकांनी पाल्यास अंडी खाण्यास सहमती दर्शविलेली नाही अशा विद्यार्थ्याच्या ओळखपत्रावर हिरव्या रंगाचा ठिपका (ग्रीन सिग्नल) देण्यात यावा. जेणेकरून शाळास्तरावर विद्यार्थ्यांना पोषण आहारामध्ये अंडी, केळी यांचा लाभ देताना सुलभता येईल. त्यानुसार विद्यार्थ्यांना ओळखपत्राच्या वाटपाबाबत संबंधित शाळा व्यवस्थापन समितीने आवश्यक ती कार्यवाही करावी असे निर्देश देण्यात आले आहेत.
