आटके टप्पा येथे पोलिसांची कारवाई
सातारा : जनावरांची अवैधरीत्या वाहतूक करणारा टेंपो पकडून पोलिसांनी दहा जर्सी जातीच्या गायींची सुटका केली. पुणे- बंगळूर महामार्गावरील नारायणवाडी- आटके टप्पा येथे आज सकाळी साडेअकराच्या सुमारास ही कारवाई झाली.
याप्रकरणी ओम विजय शेरकर (रा. रहिमतपूर) यांनी पोलिसात फिर्याद दिली. त्यावरुन हमद मगतुमसाब हुसेन (रा. दावनगिरी, कर्नाटक) व लिंगेशा एस. गोपाळ (ता. जि. दावणगिरी, कर्नाटक) यांच्यावर गुन्हा दाखल केल्याची माहिती तालुका पोलिसांनी दिली.
पोलिसांची माहिती अशी, रहिमतपूर येथील ओम शेरकर हे आज सकाळी कामानिमित्त येथे आले होते. त्यावेळी कऱ्हाडच्या आठवडी बाजारातून एका टेंपोतून गायींची बेकारीशीरीत्या वाहतूक केली जात असल्याची माहिती त्यांना मिळाली. त्यांनी याबाबतची माहिती तालुका पोलिसांना दिली.
त्यानंतर तालुका पोलिस ठाण्याच्या पथकाने संबंधित टेंपोचा पाठलाग करून नारायणवाडी गावच्या हद्दीत आटके टप्पा येथे तो टेंपो थांबवला. टेंपोची तपासणी केल्यावर त्यात जर्सी जातीच्या दहा गायी दाटीवाटीने ठेवल्याचे आढळून आले. त्या गायींची चारा पाण्याची व्यवस्था न करता त्यांना क्रूरपणे वागणूक दिल्याप्रकरणी, बेकायदेशीर वाहतूक केल्याप्रकरणी पोलिसांनी दोघांना ताब्यात घेतले.
