संगमनेर : गेल्या वर्षी अवघ्या दीड महिन्यात एल अँड टी या वित्त पुरवठा करणाऱ्या संस्थेत सुमारे ६ लाख २४ हजार ५२३ रुपयाची परस्पर अफरातफर करून अपहार केल्याप्रकरणी संस्थेच्या व्यवस्थापकाने दिलेल्या फिर्यादीवरून घारगाव पोलिसांनी फायनान्स कंपनीच्या बडतर्फ कर्मचाऱ्यावर फसवणुकीचा गुन्हा दाखल केला आहे.
खाजगी पातळीवर वित्त पुरवठा करणाऱ्या कंपनीच्या तालुक्यातील घारगाव शाखेत हा प्रकार घडला. या प्रकरणी कंपनीचे व्यवस्थापक मुकेश गायकवाड यांनी घारगाव पोलिसात फिर्याद दाखल केली असून एल अँड टी फायनान्स कंपनीत पूर्वी कर्ज वसुलीसाठी सेवेत असलेला आरोपी सचिन विजय आढाव याने गेल्या वर्षी ५ जून ते २४ ऑगस्ट २०२२ या कालावधीत जिल्ह्यातील संगमनेर, कोपरगाव, राहाता, राहुरी व पारनेर तालुक्यातील कर्जदारांना कंपनीने केलेल्या वित्त पुरवठ्याच्या बदल्यात त्यांच्याकडून मासिक हप्त्याची रक्कम जमा केली. मात्र सदर रक्कम त्याने संस्थेत भरलीच नाही. त्याच्या या कामकाजातील अफरातफरी समोर आल्यानंतर संबंधित फायनान्स कंपनीने सचिन आढाव याला बडतर्फ केले आणि त्याच्या विरोधात अंतर्गत चौकशी केली असता त्याने वरील पाच तालुक्यातील कर्जदारांकडून दीड महिन्याच्या काळात जमा केलेली रक्कम भरली नसल्याचे सिद्ध झाले. सदर रकमेचा भरणा करण्यासाठी संस्थेने त्याला मुदत दिली मात्र या मुदतीच्या कालावधीतही त्याने रक्कम जमा न केल्याने बुधवार (दि.१९) एप्रिल रोजी एल अँड टी या फायनान्स कंपनीने त्याच्या विरोधात घारगाव पोलिसात फिर्याद दाखल केली आहे. सचिन विजय आढाव हा मूळचा निमगाव खैरी तालुका श्रीरामपूर येथील असून सध्या तो संगमनेर शहराजवळील घुलेवाडी शिवारात राहतो. त्याच्या विरोधात घारगाव पोलिसांनी ४२०, ४०६, ४०८ प्रमाणे गुन्हा दाखल केला असून अधिक तपास पोलीस निरीक्षक संतोष खेडकर करत आहेत.
