अहिल्यानगर : राज्यातील कामगारांसाठी आरोग्यसेवा पुरवणारी राज्य कामगार विमा सोसायटी (ESIC) पुढील काळात १८ नवी रुग्णालये उभारणार आहे. या रुग्णालयांसाठी जमीन संपादन प्रक्रिया सुरू झाली असून, रायगडमध्ये सर्वाधिक चार, तर छत्रपती संभाजीनगर व पुणे येथे प्रत्येकी दोन अशा रुग्णालयांचा समावेश आहे.
त्याचबरोबर पालघर, सातारा, अहिल्यानगर, नाशिक, जळगाव, वर्धा, अमरावती, सांगली, रत्नागिरी व चंद्रपूर येथे प्रत्येकी एक रुग्णालय उभारण्याची योजना आहे.
सध्या ईएसआयसीमार्फत राज्यात १२ रुग्णालये आणि २५३ संलग्न रुग्णालयांमधून कामगारांना उपचार सुविधा पुरवल्या जातात. राज्यातील विमाधारक कामगारांची संख्या ४८ लाख ७० हजार ४६० कुटुंब इतकी असून, लाभार्थी साधारणपणे २ कोटींपर्यंत आहेत. या वर्धमान संख्येला दर्जेदार आरोग्य सेवा मिळावी, तसेच उपचारासाठी खाजगी रुग्णालयांना महागडे पैसे मोजावे लागू नयेत, या हेतूने ही रुग्णालये उभारली जातील.
कोणत्या ठिकाणी किती रुग्णालये?
रायगड: पेण, पनवेल, कर्जत व खोपोली येथे एकूण चार रुग्णालये
छत्रपती संभाजीनगर: वाळूंज व शेंद्रा
पुणे: बारामती व चाकण
इतर जिल्हे: पालघर, सातारा, अहिल्यानगर, नाशिक, जळगाव, वर्धा, अमरावती, सांगली, रत्नागिरी, चंद्रपूर (प्रत्येकी एक)
यापैकी आठ रुग्णालयांसाठी जागांची शिफारस झाली आहे, तर पाच रुग्णालयांसाठी जागेचे प्रस्ताव ईएसआयसीच्या मुख्य कार्यालयाकडे पाठवले आहेत. उर्वरित पाच रुग्णालयांसाठी राज्य सरकार किंवा एमआयडीसीकडून अद्याप जागा उपलब्ध झालेली नाही.
भूसंपादन प्रक्रियेला गती
प्रस्तावित १८ रुग्णालयांसाठी एमआयडीसी, जिल्हाधिकारी, डीपीआयआयटी, एसटीआयसीई, सिडको यांच्याकडून जमिनीचे संपादन केले जाणार आहे. सार्वजनिक आरोग्य व कुटुंब कल्याण मंत्री प्रकाश आबिटकर यांनी भूसंपादनाची प्रक्रिया त्वरित पूर्ण करण्याचे निर्देश दिले आहेत. यामुळे शासकीय यंत्रणांमधील समन्वय वाढवून लवकरात लवकर काम सुरू होण्याची शक्यता आहे.
सद्यस्थितीत राज्यातील ईएसआयसी रुग्णालयांमध्ये काही ठिकाणी डागडुजीची गरज आहे. मंत्री प्रकाश आबिटकर यांनी या रुग्णालयांचा कायापालट करण्याची मागणी केली आहे. वर्दळीच्या ठिकाणी असलेल्या सोसायटी रुग्णालयांमध्ये दर्जेदार सेवा दिल्यास कामगारांना महागड्या खाजगी रुग्णालयांची गरज भासणार नाही, अशी अपेक्षा व्यक्त केली जात आहे.
राज्य कामगार विमा सोसायटीने १८ नवी रुग्णालये उभारण्याचा निर्णय घेतल्याने कामगारांसाठी अत्याधुनिक आरोग्य सुविधा उपलब्ध होणार आहेत. यामुळे संपूर्ण राज्यातील कामगार कुटुंबांना लाभदायक ठरणारी आरोग्य व्यवस्था बळकट होईल, अशी अपेक्षा आहे. भूसंपादन आणि इतर तांत्रिक प्रक्रिया वेळेत पूर्ण झाल्यास या रुग्णालयांचा मार्ग लवकरच मोकळा होईल.
